مصطفي أمير يكتب: سلامتها أم حسن

اخبار اسيوط 18 ابريل 2012

أسيوط دوت كوم- مصطفي أمير

سلامتها أم حسن من العين ومن الحسد .. وسلامتك يا حسن من الرمش اللي حسد .. ملبوخة ليه ملبوخة من الفكر جالها دوخه ... جرى إيه يا أم حسن لايميها واخجلي لا الدور والزار بينفع ما تقومي وترقصي ..

ع الاعتذار لكلمات الأغنية بترتيبها ومطربها الشعبي الجميل " أحمد عدويه" .. سلامتها أم حسن لم المحافظ الهمام ياخد قرار بعد موافقة شوية شباب يدعون أنهم من شباب الثورة ..

سلامتها أم حسن لم المحافظ ينقل موظفين داخل الديوان بناء على طلب هؤلاء .. سلامتها أم حسن لم يسيب المحافظة للمكتب الفني والسكرتير العام ...سلامتها أم حسن لم المحافظ بنفض ويطنش ...

سلامتها أم حسن لم المحافظ يروح المستشفى جري علشان يطمئن علي صحة بنت صغيره ومريضه بس مش اى بنت دى بنت احد الشباب إياهم ... سلامتها أم حسن لم المحافظ يلبس زى الشباب .. جينز وتى شيرت وكاب ... سلامتها أم حسن لم المحافظ يعد بحل أزمة الأنابيب وتزداد..

سلامتها أم حسن لم المحافظ يعد بحل أزمة البنزين وتشتعل عليه المعارك .. سلامتها أم حسن لم المحافظ يطلع مبيعرفش أي حاجه في أي حاجه .. سلامتها أم حسن لم المحافظ يفهم الناس إن مفيش حد زيه ويكون أول الفلول ... سلامتها أم حسن لم المحافظ  يقول هنشغل المياه النقية وميحصلش ...

سلامتها أم حسن لم المحافظ لم يقول هنغير رؤساء المدن وميقدرش .. سلامتها أم حسن لم المحافظ  يوافق على تشغيل محلات ومطاعم بتقدم للناس سموم والله اعلم بسبب الموافقة .. سلامتها أم حسن لم المحافظ  يقول هنشيل ملصقات الدعاية وميعرفش سلامتها أم حسن لم المحافظ  يبقي عنده عربياااااااات وبنزين في الجراج والناس في أزمة مواصلات وبنزين ...

سلامتها أم حسن لم المحافظ يطلع مع الطالع وينزل مع النازل ... وأخير سلامتها أم حسن لم المحافظ يخاف من شخص واحد لا ثاني له من تكرار زيارة منفلوط وكمان ينقل موقف أهل القرى الغلابة بناء على طلب هذا الشخص ... اعذرني يا عم عدويه " حلاوتها أم حسن " طب ده مستني إيه تانى نفسي أعرف